S&P 500 წლის დასაწყისიდან თითქმის 16%-ით შემცირდა. ზოგიერთი ექსპერტი მიიჩნევს, რომ გამოკეთებამდე, ბაზარი კიდევ უფრო დაეცემა და თქვენი ინვესტიციების ღირებულების ვარდნის ყურება, შეიძლება, რთული იყოს.
რამდენად უსაფრთხო დროა ახლა ინვესტირებისთვის? უნდა იფიქროთ თუ არა პაუზაზე ან თუნდაც თქვენი ფულის ბაზრიდან გატანაზე? აი, რა უნდა იცოდეთ.
არის თუ არა საფონდო ბირჟა ახლა უსაფრთხო?
ბაზრის ვარდნა შემაძრწუნებელია მაშინაც კი, თუ გამოცდილი ინვესტორი ხართ. კიდევ უფრო არასასიამოვნოა ის ფაქტი, რომ ვერავინ გეტყვით რამდენ ხანს გაგრძელდება ან რამდენად მძიმე იქნება ეს ვარდნა. ექსპერტებსაც კი არ შეუძლიათ იმის ზუსტად განსაზღვრა, თუ რას მოიმოქმედებს ბაზარი და ეს გაურკვევლობა ძალიან რთული ასატანია.
თუმცა, საფონდო ბირჟა იმაზე უსაფრთხოა ვიდრე შეიძლება ერთი შეხედვით ჩანდეს. ინვესტირება გრძელვადიანი სტრატეგიაა და მიუხედავად იმისა, რომ ბაზრის მოკლევადიანი მოქმედება ხშირად არაპროგნოზირებადია, გრძელვადიან პერსპექტივაში მისი გამოკეთება თითქმის გარანტირებულია.
ბაზრის ისტორია ათობით კორექციასა და კრახს მოიცავს. მხოლოდ ბოლო 20 წლის განმავლობაში მან გადალახა dot-com-ის ბუმი, დიდი რეცესია და 2020 წლის პანდემიასთან დაკავშირებული კრახი.
მიუხედავად იმისა, რომ ყველა ეს ვარდნა იმ მომენტში საგანგაშო იყო, ბაზარმა გაუმჯობესება და დროთა განმავლობაში დადებითი საშუალო ანაზღაურების დაფიქსირება მოახერხა.
რაც არ უნდა ცუდი იყოს ვარდნა, ძალიან სავარაუდოა, რომ ბაზარი საბოლოოდ მას გადალახავს. მიუხედავად იმისა, რომ ეს, შეიძლება, რთული პროცესი იყოს, გრძელვადიან პერსპექტივაზე ორიენტირებულობა მოკლევადიან არასტაბილურობასთან შეგუებაში დაგეხმარებათ.
როგორ უნდა დაიცვათ თქვენი ფული?
იქიდან გამომდინარე, რომ ვარდნა დროებითია, თქვენ ინვესტიციების დაცვის ერთ-ერთი საუკეთესო გზა თქვენი ფულის ბაზარზე შენარჩუნებაა.
მიუხედავად იმისა, რომ, შეიძლება, ეს სტრატეგია არაინტუიციურად ჟღერდეს, გახსოვდეთ, რომ ტექნიკურად, პოზიციების გაყიდვამდე, ფულს არ კარგავთ. თქვენი საინვესტიციო პორტფელის ღირებულება შეიძლება შემცირდეს, მაგრამ ბაზრის აღდგენისას თქვენი ინვესტიციები უნდა გაუმჯობესდეს. გაითვალისწინეთ, რომ ეს რთული პროცესი, შეიძლება, ზოგიერთმა კომპანიამ ვერ გადაიტანოს და აღდგენა ვერ მოახერხოს, სწორედ ამიტომ არის მნიშვნელოვანი საინვესტიციო პორტფელის დივერსიფიკაცია, თუ მხოლოდ რამდენიმე კომპანიაზე არ იქნებით დამოკიდებული, თქვენი ინვესტიციები და რისკები სწორად გექნებათ გადანაწილებული, დიდი შანსია, რომ ბაზრის ვარდნის შემდეგ თქვენი პორტფელიც აღდგება.
ასევე, აუცილებელია საგანგებო ფონდი იქონიოთ. ვარდნის დროს აქციების გაყიდვამ, შეიძლება, ფულის დაკარგვა გამოიწვიოს. თუ მოულოდნელი ხარჯის წინაშე აღმოჩნდებით, საგანგებო ფონდი თქვენი პოზიციების გაყიდვის თავიდან აცილებაში დაგეხმარებათ.
ბაზრის მერყეობის გაძლება ადვილი არ არის, მაგრამ ეს ნორმალური და დროებითი მოვლენაა. გრძელვადიანი პერსპექტივის შენარჩუნებითა და სწორი სიფრთხილის ზომების მიღებით, შეგიძლიათ მშვიდად იძინოთ, რადგან გეცოდინებათ, რომ თქვენი ინვესტიციები მაქსიმალურად დაცულია.
