უორენ ბაფეტი ლეგენდარული ინვესტორია. მის წარმატებაში ერთ-ერთი საუკეთესო რამ ის არის, რომ ბაფეტს აქამდე არნახული ან არაჩვეულებრივი საინვესტიციო სტრატეგია არ გამოუყენებია.
ომაჰას ორაკულმა (ბაფეტს ხშირად ასე მოიხსენიებენ) საარსებო წყარო ღირებულებაზე ორიენტირებული ინვესტირებით გამოიმუშავა. ეს სტრატეგია გულისხმობს ისეთი კომპანიების პოვნას, რომელთა აქციების ფასიც მათ შინაგან ღირებულებაზე ნაკლებია. ასეთ დაუფასებელ კომპანიაში ინვესტირებით, ინვესტორები იმედოვნებენ, რომ საფონდო ბირჟა ერთ მშვენიერ დღეს მათ სათანადოდ დააფასებს.
შესაძლოა Bear Market საჩუქარი იყოს
Bear ბაზრები გარკვეულწილად აუცილებელია. აქციების ფასები რომ მხოლოდ იზრდებოდეს, ეს ინვესტირების ერთ-ერთ მთავარ პრინციპს დაარღვევდა: უფრო მაღალი რისკი უფრო მაღალ მოსალოდნელ მოგებას უნდა ნიშნავდეს. თუ ინვესტორები იფიქრებენ, რომ აქციების ფასები მხოლოდ აღმავალი მიმართულებით მოძრაობს, ისინი ფულს ჩადებენ არც თუ ისე დიდ ბიზნესში, რადგან, მიუხედავად კომპანიის სიდიდისა, ისინი ფულის გამომუშავებას მაინც შეძლებენ. ეს კიდევ უფრო გაზრდის ფასებს, რაც აქციების გადამეტებულ შეფასებას გამოიწვევს და, სავარაუდოდ, სამომავლო შემოსავლებს შეამცირებს.
Bear market-ის უარყოფით მხარეებზე ორიენტირების ნაცვლად, ინვესტორებმა ეს მოვლენა უნდა განიხილონ, როგორც შანსი – შეიძინონ ძლიერი კომპანიების აქციები შემცირებულ ფასებად. 2020 წლის დასაწყისის ხანმოკლე bear market-ის დროს S&P 500 30%-ზე მეტით დაეცა. ზოგიერთი ინვესტორი პანიკაში ჩავარდა და გაყიდა თავისი აქციები, ზოგი კი ამ პერიოდს შესაძლებლობად მიიჩნევდა. 2020 წლის მარტის დაბალი მაჩვენებლების შემდეგ, 9 აგვისტოს მდგომარეობით S&P 500 78%-ზე მეტით გაიზარდა.
უორენ ბაფეტის ერთ-ერთი ყველაზე ცნობილი გამონათქვამია: „იყავი ფრთხილად, როდესაც სხვები ხარბები არიან და იყავი ხარბი, როდესაც სხვებს ეშინიათ.“ მას კარგად ესმის, რომ ინვესტორები ხშირად ჰყვებიან მასებს და საკუთარ გრძელვადიან ინტერესებსაც კი ივიწყებენ. საზრიანი ინვესტორები კი რთულ პერიოდებში დიდ შესაძლებლობებს ხედავენ.
ფასი ღირებულებაში ნუ აგერევათ
აქ მნიშვნელოვანია გაითვალისწინოთ ერთ ფაქტი: შესაძლოა $10-ად შეფასებული აქცია რეალურად უფრო ძვირი იყოს, ვიდრე – $100-ად.
უკეთესი გზა იმის დასადგენად, არის თუ არა აქციები დაუფასებელი არის მისი P/E (ფასი/მოგება) კოეფიციენტის ინდუსტრიის სხვა წარმომადგენლების იმავე მაჩვენებელთან შედარება. ამ კოეფიციენტის პოვნა მარტივია, უბრალოდ ერთი აქციის ამჟამინდელი ფასი მის EPS-ზე (მოგება თითო აქციაზე) უნდა გაყოთ. თუ მიღებული სიდიდე შესადარებელი კომპანიების იმავე მაჩვენებელზე საგრძნობლად მაღალია, ეს შეიძლება იმის ნიშანი იყოს, რომ ის გადაჭარბებულად არის შეფასებული. თუ P/E კოეფიციენტი დაბალია, მაშინ პირიქით, ეს აქცია დაუფასებელია.
გაიაზრეთ დროისა და რთული პროცენტის მნიშვნელობა
თუ თქვენ გრძელვადიან პერსპექტივაზე ორიენტირებული ინვესტორი ხართ, ბაზრის მოკლევადიან რყევებს თქვენს სტრატეგიაზე ზემოქმედების ნება არ უნდა მისცეთ. თქვენ მიერ კომპანიაში ინვესტირების გადაწყვეტილება მის გრძელვადიან პოტენციალს უნდა ეყრდნობოდეს.
უორენ ბაფეტი არის „იყიდე და შეინარჩუნე“ ტიპის ინვესტირების ერთ-ერთი ნათელი მაგალითი, რადგან მას ესმის დროისა და რთული პროცენტის მნიშვნელობა. საინვესტიციო სიბრძნე ამბობს, რომ ბაზარზე დრო უფრო მნიშვნელოვანია, ვიდრე ბაზართან სინქრონიზება. უნდა გაიაზროთ, რომ საფონდო ბირჟაზე განვითარებული მოკლევადიანი მოვლენები ხშირად მხოლოდ პატარა დაბრკოლებებია, რომლებსაც თქვენი გრძელვადიანი კურსის შეცვლის უფლება არ უნდა მისცეთ.
