რესტრუქტურიზაცია არის კომპანიის მიერ განხორციელებული ქმედება, რომელიც მიზნად ისახავს, მნიშვნელოვნად შეცვალოს ფინანსური და ოპერატიული ასპექტები. როგორც წესი, რესტრუქტურიზაციას მენეჯმენტი მიმართავს მაშინ, როდესაც ბიზნესი ფინანსური წნეხის წინაშე დგას. ეს არის კორპორატიული ქმედების სახეობა, რომელიც კომპანიის ვალის, ოპერაციების ან სტრუქტურის მნიშვნელოვან ცვლილებას გულისხმობს.
რესტრუქტურიზაციის გააზრება
არსებობს მრავალი მიზეზი, რის გამოც შეიძლება კომპანიებმა რესტრუქტურიზაციას მიმართონ. მათ შორის არის ფინანსური საფუძვლების გაუარესება, სუსტი შემოსავალი და მოგება, გადაჭარბებული ვალი, ძალიან დიდი კონკურენცია ინდუსტრიაში ან ბაზარზე პოზიციების დასუსტება.
მენეჯმენტმა შეიძლება რესტრუქტურიზაცია აირჩიოს, როგორც გაყიდვის, შერწყმის, საერთო მიზნების ცვლილებისთვის მომზადების საშუალება. მაგალითად, შესაძლოა, კომპანიაში რესტრუქტურიზაცია დაიწყოს მას შემდეგ, რაც ახალი პროდუქტის ან სერვისის გამოშვება წარმატებული არ აღმოჩნდება. შესაბამისად, ფირმა ვერ შეძლებს ხელფასების და ვალის დასაფარად საკმარისი შემოსავლის გამომუშავებას.
შედეგად, აქციონერებისა და კრედიტორების შეთანხმებიდან გამომდინარე, კომპანიამ შეიძლება გაყიდოს თავისი აქტივები, მიმართოს ფინანსური შეთანხმებების რესტრუქტურიზაციას, ვალის შესამცირებლად გამოუშვას ახალი აქციები ან გაკოტრების შესახებ განაცხადოს.
რესტრუქტურიზაციის პროცესი
როდესაც კომპანიაში შიდა რესტრუქტურიზაცია მიმდინარეობს, შეიძლება ოპერაციები, პროცესები, დეპარტამენტები ან მესაკუთრეები შეიცვალოს, რაც ბიზნესს საშუალებას მისცემს, უფრო ინტეგრირებული და მომგებიანი გახდეს. კომპანიების მმართველი გუნდები, რესტრუქტურიზაციის გეგმებზე მოლაპარაკებებისთვის, ხშირად ფინანსურ და იურიდიულ მრჩევლებს ქირაობენ. კომპანიის ნაწილი შეიძლება ინვესტორებზე გაიყიდოს და დაინიშნოს ახალი აღმასრულებელი დირექტორი, რომელიც ფირმას ცვლილებების დანერგვაში დაეხმარება.
შედეგები შეიძლება მოიცავდეს ცვლილებებს პროცედურებში, კომპიუტერულ სისტემებში, ქსელებში, ლოკაციებში და იურიდიულ საკითხებში.
რესტრუქტურიზაცია შეიძლება მტკივნეული პროცესი იყოს, რადგან ამ დროს კომპანიის შიდა და გარე სტრუქტურა იცვლება და სამუშაო ადგილები მცირდება. მაგრამ ამ პროცესის დასრულებამ უფრო გამარტივებული, ეკონომიკურად ჯანსაღი ბიზნეს ოპერაციები უნდა გამოიწვიოს.
მას შემდეგ, რაც თანამშრომლები მოერგებიან ახალ გარემოს, შეიძლება კომპანია უკეთეს მდგომარეობაში აღმოჩნდეს თავისი მიზნების მისაღწევად. თუმცა, ყველა კორპორატიული რესტრუქტურიზაცია კარგად არ სრულდება. ზოგჯერ, შესაძლოა, კომპანიას დასჭირდეს მარცხის აღიარება და აქტივების გაყიდვის ან ლიკვიდაციის დაწყება, რათა, სამუდამოდ დახურვამდე, კრედიტორების წინაშე არსებული ვალდებულებები დააკმაყოფილოს.
მაგალითი
2019 წლის მარტის ბოლოს, აშშ-ში დაზოგვის უმსხვილესმა მაღაზიათა ქსელმა — Savers Inc.-მა მიაღწია რესტრუქტურიზაციის შეთანხმებას, რომელმაც მისი ვალის ტვირთი 40%-ით შეამცირა. შედეგად კომპანიის წილების მფლობელები გახდნენ Ares Management Corp. და Crescent Capital Group LP.
რესტრუქტურიზაცია, რომელიც კომპანიის დირექტორთა საბჭომ დაამტკიცა, მოიცავდა $700 მილიონის ოდენობით სესხის რეფინანსირებას და საცალო ვაჭრობის საპროცენტო ხარჯების შემცირებას.
