დივიდენდურ აქციებში ინვესტირება შეიძლება მიმზიდველი სტრატეგია იყოს დამწყები ინვესტორებისთვის, რომლებიც რეგულარული შემოსავლის გამომუშავებას ცდილობენ. დივიდენდური აქციები ეკუთვნის კომპანიებს, რომლებიც მოგებას აქციონერებზე დივიდენდების სახით ანაწილებს. დღევანდელ სტატიაში ვისაუბრებთ იმის შესახებ, თუ როგორ უნდა ჩავდოთ ინვესტიცია დივიდენდურ აქციებში და როგორ გავზარდოთ მაქსიმალურად ამ საინვესტიციო სტრატეგიიდან მიღებული სარგებელი.
გაიაზრეთ დივიდენდებისა და დივიდენდური სარგებლის მნიშვნელობა
როგორც უკვე აღვნიშნეთ, დივიდენდები კომპანიების მიერ აქციონერებზე მოგების განაწილების საშუალებას წარმოადგენს. დივიდენდური სარგებელი, გამოხატული პროცენტულად, გამოითვლება წლიური დივიდენდური ანაზღაურების აქციების ფასზე გაყოფით. ეს მეტრიკა გვიჩვენებს, რამდენს იხდის კომპანია ყოველწლიურად დივიდენდებში მისი აქციების ფასთან შედარებით. დამწყები ინვესტორები უნდა გაეცნონ ამ კონცეფციებს, რათა დივიდენდური აქციების პოტენციური ანაზღაურება სწორად შეაფასონ.
ფოკუსირდით დივიდენდების უსაფრთხოებაზე
მოიძიეთ კომპანიები, რომლებსაც დივიდენდების გადახდის თანმიმდევრული გამოცდილება და სტაბილური ფინანსური მდგომარეობა აქვს. ფინანსური ანგარიშგებების, შემოსავლების ზრდის, ფულადი სახსრების ნაკადების და დივიდენდების გადახდის ისტორიის გაანალიზება საშუალებას მოგცემთ დაადგინოთ, თუ რამდენად გააჩნია კონკრეტულ კომპანიას გრძელვადიან პერსპექტივაში დივიდენდების გადახდის უნარი.
ყურადღება მიაქციეთ დივიდენდების ზრდას
დივიდენდების ზრდა არის ერთ-ერთი ყველაზე მნიშვნელოვანი ფაქტორი, რომელიც დივიდენდურ აქციებში ინვესტირებისას უნდა გაითვალისწინოთ. ფოკუსირდით დივიდენდ არისტოკრატებზე და დივიდენდ მეფეებზე, კომპანიებზე, რომლებსაც დროთა განმავლობაში დივიდენდების გაზრდის ხანგრძლივი ისტორია გააჩნია. ასეთი კომპანიები წარმოაჩენენ ფინანსურ სიძლიერეს და ვალდებულებას, აქციონერებს მეტი ფასეულობა შესთავაზონ. დივიდენდების თანმიმდევრულმა ზრდამ შეიძლება მიმზიდველი გრძელვადიანი ანაზღაურებით უზრუნველგყოთ და ინფლაციისგან თავის დაცვაში დაგეხმაროთ.
მიმართეთ დივერსიფიკაციას
დივერსიფიკაცია ფუნდამენტური პრინციპია ნებისმიერი საინვესტიციო სტრატეგიისთვის, მათ შორის დივიდენდურ აქციებში ინვესტირებისთვის. სხვადასხვა სექტორის დივიდენდურ აქციებში ინვესტირებით რისკის დაბალანსებას შეძლებთ, რადგან მათ ეკონომიკური ციკლების მიმართ განსხვავებული სტაბილურობისა და მგრძნობელობის დონე გააჩნია. ინვესტიციების ასეთი სახით გადანაწილება დაგეხმარებათ, საინვესტიციო პორტფელზე კონკრეტული სექტორის წარმადობის გავლენა შეამციროთ.
მიმართეთ დივიდენდების რეინვესტირებას
იფიქრეთ დივიდენდების რეინვესტირებაზე, რათა რთული პროცენტის ეფექტი უკეთ გამოიყენოთ. ბევრი საბროკერო პლატფორმა გვთავაზობს დივიდენდების რეინვესტირების გეგმებს (DRIPs), რომელიც ავტომატურად აბრუნებს თქვენს დივიდენდებს აქციებში. ეს საშუალებას გაძლევთ შეიძინოთ მეტი აქცია დამატებითი ხარჯების გარეშე, რაც პოტენციურად თქვენს გრძელვადიან ანაზღაურებას გაზრდის.
იყავით მუდამ ინფორმირებული
ადევნეთ თვალი სიახლეებს იმ კომპანიების შესახებ, რომელთა აქციებსაც ფლობთ. რეგულარულად გადახედეთ მათ ფინანსურ მაჩვენებელს და მათი ბიზნეს პერსპექტივის ნებისმიერ ცვლილებას. ეს დაგეხმარებათ მიიღოთ ინფორმირებული გადაწყვეტილებები და გადაამოწმოთ, კვლავ შეესაბამება თუ არა თქვენი ინვესტიციები თქვენს საინვესტიციო კრიტერიუმებს.
