საფონდო ბირჟა შეიძლება ხანდახან შემაძრწუნებელი იყოს და თუ ინვესტირებაზე ნერვიულობთ, მარტო არ ხართ. ცვალებადობა შემაშფოთებელია და ამის ფონზე, შესაძლოა, რეცესია მოახლოვდეს, რადგან ბევრ ინვესტორს პანიკა აქციების გაყიდვისკენ უბიძგებს.
თუმცა, მომავალი კვირების ან თვეების განმავლობაში პოტენციური ცვალებადობის მიუხედავად, საფონდო ბირჟაზე ბევრი ფულის გამომუშავება მაინც შესაძლებელია – და ეს უფრო ადვილია, ვიდრე თქვენ ფიქრობთ. დღეს შემოგთავაზებთ 3 საიდუმლოს, რომელიც ამაში დაგეხმარებათ.
- დაიწყეთ ინვესტირება ადრე
როდესაც საქმე საფონდო ბირჟაზე სიმდიდრის შექმნას ეხება, დრო თქვენი ყველაზე ღირებული რესურსია. რთული პროცენტის მექანიზმი საშუალებას გაძლევთ, რომ ინვესტირებული ფული ექსპონენციურად გაზარდოთ.
რაც უფრო ადრე დაიწყებთ ინვესტირებას, მით მეტი ფულის გამომუშავებას შეძლებთ. ქვემოთ მოცემულ ფოტოზე ნათლად ჩანს, თუ რამდენად მნიშვნელოვანი ფაქტორია დრო.
თუ ინვესტირებას გვიან დაიწყებთ, არა უშავს. ამ საქმეში ყოველი წელი მნიშვნელოვანია, თუმცა რაც უფრო მალე დაიწყებთ, მით უფრო ადვილი იქნება თქვენი შემოსავლის მაქსიმიზაცია.
- ნუ ინერვიულებთ ვარდნაზე
როდესაც ბაზარი არასტაბილურია, შესაძლოა, ინვესტირება საშიში ჩანდეს. მაგრამ ინვესტირება გრძელვადიანი სტრატეგიაა, რაც იმას ნიშნავს, რომ ბაზრის მოკლევადიან ცვალებადობას ნაკლები მნიშვნელობა ენიჭება.
მართალია, ეს bear market შეიძლება მალე არ დასრულდეს და უახლოეს კვირებში ან თვეებში აქციების ფასები შესაძლოა კიდევ უფრო შემცირდეს, მაგრამ ისტორიულად, ბაზარმა ყოველგვარი ვარდნისგან აღდგენა მოახერხა. არსებობს დიდი ალბათობა იმისა, რომ ის მომავალი ვარდნისგან „გამოჯანმრთელებასაც“ შეძლებს.
მიუხედავად იმისა, რომ, შესაძლოა, ბაზრის ვარდნა რთული ასატანი იყოს, უნდა გაითვალისწინოთ, რომ ეს ჩვეულებრივი და, ამასთან, დროებითი მოვლენაა. საუკეთესო გადაწყვეტილება იქნება ფასების ყოველდღიურ რყევებზე კონცენტრირებისგან თავის არიდება და გრძელვადიან პერსპექტივაზე ორიენტირება.
- შეარჩიეთ სწორი აქციები
თუ საფონდო ბირჟაზე მაქსიმალურად მეტი ფულის გამომუშავება გსურთ, შესაძლოა მაღალი რისკისა და ჯილდოს მქონე ინვესტიციების არჩევა მაცდური იყოს. თუმცა ეს ინვესტიციები ყოველთვის არ ანაზღაურდება და შეიძლება იმაზე ბევრად მეტი დაკარგოთ, ვიდრე გამოიმუშავებთ.
ასე რომ, უფრო უსაფრთხო ვარიანტია ნელი ზრდის ტემპის მქონე, მაგრამ სტაბილურ აქციებში ინვესტირება. ასეთი ინვესტიციები ერთ ღამეში მილიონერად არ გაქცევთ, მაგრამ უფრო სავარაუდოა, რომ დროთა განმავლობაში მათგან დიდი სარგებელი მიიღოთ. საუკეთესო გრძელვადიანი ინვესტიციები არის ის კომპანიები, რომლებსაც გააჩნია მყარი ბიზნეს საფუძვლები, როგორიც არის, მაგალითად, ძლიერი ფინანსები და კომპეტენტური მმართველი გუნდი.
თუ ინვესტირებისას ნაკლებად აქტიურ მიდგომას ანიჭებთ უპირატესობას, შეიძლება, S&P 500-ის საინდექსო ფონდი თქვენთვის შესაფერისი ვარიანტი იყოს. ამ ტიპის ინვესტიციით დროთა განმავლობაში თქვენ დიდი ალბათობით დადებით საშუალო ანაზღაურებას მიიღებთ. ამასთან, აქციების ინდივიდუალურად შერჩევა არ მოგიწევთ.
მოკლევადიანი ცვალებადობის მიუხედავად, საფონდო ბირჟა სიმდიდრის დასაგროვებლად შესანიშნავი საშუალებაა. დასაწყებად ბევრი ფული არ გჭირდებათ, მაგრამ აუცილებელია სტრატეგია. სწორი მიდგომის საშუალებით შეძლებთ დიდი ძალისხმევის გარეშე პოტენციურად ასობით ათასი დოლარი გამოიმუშაოთ.
