Bear market-ის ტერიტორიაზე მოხვედრის შემდეგ Dow Jones Industrial Average-მა, Nasdaq-მა და S&P 500-მა ღირებულების ნაწილი დაიბრუნა. ზოგიერთი ინვესტორი იმედოვნებს, რომ ბაზრის გამოცოცხლება გაგრძელდება, რაც მათ საინვესტიციო პორტფელებს წლის დასაწყისში მიღებული დარტყმისგან გამოჯანმრთელების საშუალებას მისცემს.
სამწუხაროდ, ძალიან ადრეა იმის დადგენა, მართლა დასრულდა თუ არა bear market და, შესაძლოა, უახლოეს კვირებში აქციების ფასები კიდევ უფრო შემცირდეს.
თუმცა, მიუხედავად იმისა, წინ კლება მოგველის, თუ აღდგენა, ინვესტირება ნებისმიერ შემთხვევაში გონივრულია.
რატომ ღირს ინვესტირება როგორც კარგ, ასევე ცუდ პერიოდებში?
ადვილია ინვესტირების შეწყვეტა მაშინ, როდესაც ბაზრები იზრდება ან ეცემა. პირველ შემთხვევაში, შესაძლოა, თავი შეიკავოთ ინვესტირებისგან, რადგან გსურთ აქციები დაბალ ფასებში შეიძინოთ. ხოლო რაც შეეხება bear market-ს, ამ დროს შეიძლება არ გსურდეთ ინვესტირების გაგრძელდება, რადგან ბაზარი განსაკუთრებით არასტაბილურია და ზარალის განცდის გეშინიათ.
თუმცა, სინამდვილეში, გონივრული იქნება გარკვეული განრიგის შედგენა და თანმიმდევრულად ინვესტირება. ეს კი ნიშნავს ინვესტირებას ორივე შემთხვევაში – კარგ და ცუდ პერიოდებში.
დოლარის ღირებულების გაშუალედება არის შესანიშნავი საინვესტიციო სტრატეგია, რომელიც რეგულარულ ინტერვალებში კონკრეტული თანხების ინვესტირებას გულისხმობს და არ აქვს მნიშვნელობა, თუ რა ღირს ესა თუ ის აქცია მოცემულ მომენტში. ეს სტრატეგია ინვესტირების პროცესიდან ემოციებს გამორიცხავს, რაც მაღალი ცვალებადობის პირობებში განსაკუთრებით მნიშვნელოვანია. დოლარის ღირებულების გაშუალედების სტრატეგიის დროს გამოყენებული შუალედები თქვენზეა დამოკიდებული, ეს შეიძლება იყოს ყოველკვირეული, ყოველთვიური, კვარტალური და სხვა შუალედებით ინვესტირება. მნიშვნელოვანია, რომ განსაზღვროთ და დაიცვათ კონკრეტული განრიგი. ამ სტრატეგიის მიზანია თავიდან აიცილოთ ის ზარალი, რომელიც ბაზართან სინქრონიზების მცდელობას მოაქვს.
ინვესტორები, რომლებიც დოლარის ღირებულების გაშუალედების სტრატეგიას იყენებენ, როგორც წესი, თითო აქციისთვის უფრო დაბალ საშუალო ღირებულებას იხდიან, ვიდრე ისინი, ვინც ბაზართან სინქრონიზებას ცდილობენ. ასე რომ, ამ სისტემაზე ყურადღების გამახვილება ნამდვილად ღირს.
აი როგორ მუშაობს ეს სტრატეგია პრაქტიკაში: დავუშვათ, თქვენ არ ხართ ინდივიდუალურ აქციებზე ორიენტირებული ინვესტორი, და ამის ნაცვლად უპირატესობას საფონდო ინდექსებს ანიჭებთ. თუ გადაწყვეტთ, რომ ყოველთვიურად S&P 500-ში $500-ის ოდენობის ინვესტიციის განხორციელება გსურთ, შეგიძლიათ უბრალოდ თარიღი აირჩიოთ და ეს განრიგი დაიცვათ. როდესაც ნებისყოფას გამოიჩენთ და ამ სტრატეგიას შეუფერხებლად მიჰყვებით, საშუალება მოგეცემათ, რომ მოკლევადიან პერიოდებში საფონდო ბირჟის მდგომარეობა უგულებელყოთ, ამით კი თქვენი სტრესის დონეც საგრძნობლად შემცირდება.
გეგმას მიჰყევით
განსაზღვრული თანხის თანმიმდევრულად ინვესტირება სიმდიდრის დასაგროვებლად და თქვენი ფინანსური მიზნების მისაღწევად შესანიშნავი გზაა. ასე რომ, იმაზე ფოკუსირების ნაცვლად, თუ რამდენად კარგი წარმადობით ხასიათდება მოცემულ მომენტში საფონდო ბირჟა, დაიცავით რეგულარულად ინვესტირების გრაფიკი და გჯეროდეთ, რომ ეს მიდგომა იმუშავებს.
