ლორენ სიმონსის ცხოვრება მრავალ განსხვავებულ საქმიანობასთან არის დაკავშირებული, დაწყებული ბრენდებთან თანამშრომლობით, დამთავრებული უოლ სტრიტით. ბიზნეს ოსტატობის, შრომისმოყვარეობისა და ჭკვიანური ფინანსური გადაწყვეტილებების წყალობით, 2022 წელს 28 წლის გოგონამ თავისი ფინანსური იმპერიის შენებაში ახალ ეტაპს მიაღწია და წელიწადში $1 მილიონი გამოიმუშავა. ეს ძალიან მნიშვნელოვანი მოვლენაა ნიუ-იორკის საფონდო ბირჟის (NYSE) ყოფილი ტრეიდერისთვის.
დღეს შემოგთავაზებთ პრინციპებს, რომელთა საშუალებითაც ლორენ სიმონსმა საოცნებო ცხოვრება შეიქმნა.
ფულისა და საქმის მიმართ მიზანმიმართულობა
ამერიკელები ძალიან დააზარალა ზედმეტად მაღალმა ინფლაციამ, საპროცენტო განაკვეთების ზრდამ, არასტაბილურმა საფონდო ბირჟამ და მიწოდების ჯაჭვის პრობლემებმა, რომლებიც მოთხოვნა-მიწოდების ციკლს არღვევს. სიმონსი ამბობს, რომ 2023 წლისთვის ის ხელახლა აფასებს რისკისადმი საკუთარი ტოლერანტობის დონეს და გაურკვევლობის წინააღმდეგ სხვებსაც სიფრთხილის გამოჩენისკენ მოუწოდებს.
ლორენი ასევე გვირჩევს, რომ კარიერასთან დაკავშირებით იმპულსური გადაწყვეტილებები არ მივიღოთ, მაგალითად, სამსახურიდან არ უნდა წავიდეთ მანამ, სანამ სათადარიგო ვარიანტი არ გვექნება. ამასთან, საჭიროა დამატებით საქმიანობაზე ორიენტირება, რათა შემოსავალი გავზარდოთ.
ინვესტირება
თითოეული ადამიანი, საკუთარი შემოსავლიდან და სხვა მახასიათებლებიდან გამომდინარე, ინვესტიციებს განსხვავებული მეთოდებით ახორციელებს, თუმცა დივერსიფიკაცია უნივერსალური გაკვეთილია. ამასთან, პორტფელის დივერსიფიკაციის საჭიროება არა მხოლოდ საფონდო ბირჟაზე, არამედ ყველა სახის ინვესტიციებზე ვრცელდება.
ლორენ სიმონსი მომხრეა, რომ ადამიანმა კარგად შეისწავლოს საკუთარი თავი, პიროვნული თვისებები, გაიაზროს, რა არის მისთვის მისაღები, რა არის მიუღებელი და საინვესტიციო გადაწყვეტილებები ამ მახასიათებლებზე დაყრდნობით მიიღოს.
ლორენი ასევე ფიქრობს, რომ მნიშვნელოვანია ფინანსური ტენდენციების ფეხი ავუწყოთ, მეტი ცოდნა დავაგროვოთ, რადგან, ადამიანმა ზრდა და განვითარება არასოდეს უნდა შეწყვიტოს.
კარიერა
ლორენი გვირჩევს, რომ ახალი შესაძლებლობების მიმართ ღია ვიყოთ. იგი კოლეჯში გენეტიკას სწავლობდა, მანამდე კი — არქიტექტურულ ინჟინერიას. არასოდეს უფიქრია, რომ მისი ცხოვრება ფინანსების სამყაროს დაუკავშირდებოდა. სწორედ ამიტომ მნიშვნელოვანია, რომ საკუთარი თავი მხოლოდ ერთი პროფესიით არ შევიბოჭოთ და ახალმა შესაძლებლობებმა არ უნდა შეგვაშინოს.
